Seahawk-helikoptra vil gi Luftforsvaret kapasitet til å støtte Kystvakta i å halde kontroll over havområda våre, utøve suverenitetshevding og gjennomføre redningsaksjonar.
Prosjekt: P1129 Maritim helikopterkapasitet
Omfang: Seks Sikorsky MH-60R
Prisjustert kostnadsramme: 13 942 millionar kroner
Kontrakt inngått: 26. oktober 2023
Tid: Helikoptra skal leverast i 2027
Med helikopter om bord får Kystvakta større rekkjevidd, raskare responstid og styrkt kontrollkapasitet.
Maritim helikopterkapasitet skal etablerast med MH-60R Seahawk for å betre evna til Kystvakta innan suverenitetshevding, myndigheitsutøving, søk og redning (SAR) til sjøs, samt støtte til det sivile samfunnet.
Helikoptra vil òg styrkje Forsvaret si fellesoperative kapasitet, mellom anna gjennom bidrag til overvaking, situasjonsforståing og maritim krigføring.
I juni 2022 vedtok regjeringa å avslutte innfasingen av NH90 maritime helikopter og gav Forsvarsmateriell i oppdrag å heve kontrakten med leverandøren. Sommaren 2023 godkjende Stortinget ei anskaffing av seks MH-60R Seahawk gjennom ei myndigheitsavtale med USA.
Kontrakten om produksjon av dei norske helikoptra blei signert 26. oktober 2023 mellom den amerikanske marinen og helikopterprodusenten Lockheed Martin Sikorsky. Helikoptra skal takast imot i 2027 og bli fasa inn i perioden fram til 2030, med base på Bardufoss.
MH-60R, ofte omtalt berre som «Romeo», er ei modernisert utgåve av SH-60B/F Seahawk som blei sett i teneste på midten av 1980-talet. Romeo blei fasa inn i den amerikanske marinen i 2006. Sidan den gong er MH-60R levert i over 330 eksemplar til USA, Australia, India, Saudi-Arabia og Danmark. Helikopteret er òg bestilt av Hellas og Spania, i tillegg til Noreg.
Kostnadsramma omfattar langt meir enn sjølve helikoptra. Ho inkluderer mellom anna kommunikasjonsutstyr, installasjon og integrasjon av dette, reservedelar, støtteutstyr, trening og opplæring, usikkerheitsavsetjing samt oppgradering og tilpassing av bygningsmassen på Bardufoss. I tillegg blir Sjøforsvaret sine helikopterberande fartøy utrusta og tilpassa. Dette omfattar, i tillegg til dei tre kystvaktfartøya i Jan Mayen-klassen og KV Svalbard, òg dei fire fregattane i Fridtjof Nansen-klassen og logistikkfartøyet KNM Maud.
Mellom anna med erfaringar frå Danmark, som allereie opererer MH-60R, er det mogleg å korte ned perioden for operativ test og evaluering (OT&E) og kome tidleg i gang med etablering av SHOL på fartøya («Ship Helicopter Operating Limitations»).
