Kampvognprosjektet var den største investeringa Hæren nokon gong har gjort. Dei nye CV90-vognene erstattar Hæren si gamle CV9030-flåte og vil gi Hæren eit betydeleg operativt løft.
Prosjektnamn: Prosjekt 5436 – Nye kampvogner til Hæren
Omfang: 144 kampvogner av typen CV90
Prosjektverdi: Ei ramme på drygt 10 mrd. kroner
Prosjektdeltakarar: Forsvarsmateriell og Hæren
Oppdrag gitt: Juni 2012
Ferdigstilling: Innan 2019
I april 2019 mottok Hæren den siste leveransen av CV90-kampvognene sine. Det norske kampvognprosjektet leverte 74 stormpanservogner, 21 oppklaringsvogner, 15 stridsleiingsvogner, 16 stormingeniørvogner og 16 multirollevogner med bergings-, VIP-, transport- og sanitetskapasitet. Dei nye vognene erstattar CV9030-vognene som vart tekne i bruk i Hæren på 1990-talet.
Prosjektet omfatta både ei oppgradering av CV9030-flåten med 103 kampvogner og bygging av 41 heilt nye vogner. Den nye CV90-familien blir levert i fem modellar med ulike eigenskapar.
Hovudkontraktør for leveransen av Hæren sine nye CV90-kampvogner er BAE Systems Hägglunds AB frå Sverige. Vognene er heildigitaliserte, noko som betyr at alt frå ammunisjonslager til motorstatus kan kontrollerast via berøringsskjermar. Dei nye vognene er langt betre verna mot miner, samstundes som dei har svært god fart og mobilitet. Vognene kan operere både under ekstrem kulde og ekstrem varme. Hæren sine nye CV90-kampvogner har like mange IP-adresser som ei mellomstor norsk verksemd.
Prosjektet har òg inngått fleire gjenkjøpsavtalar som gjer at ei rekkje norske industriverksemder er delaktige i prosjektet, mellom anna CHS Nor AS, Ritek AS, Kongsberg Gruppen, Thales Norge AS, Vinghøg AS, T&G Elektro, Norautron AB og Tamek AS.
