Beskriving

For å vidareføre ein maritim patruljefly- og ISR-kapasitet som kan møte dagens og framtidige utfordringar, har Forsvarsmateriell fått i oppdrag å anskaffe nye maritime patruljefly.

Poseidon-flya kan dekkje store havområde på kort tid og halde seg lenge i eit operasjonsområde. Flya har evne til å detektere, identifisere, følgje og om nødvendig nedkjempe mål under vatn.

P-8A Poseidon vil òg vidareføre bidrag til suverenitetshevding og myndigheitsutøving, og er dessutan ein kapasitet for søk og redning i havområda utanfor Noreg. I tillegg er dette eit viktig bidrag til samfunnstryggleiken gjennom evna til å støtte maritime kontraterroroperasjonar.

Kjøpet blir gjort som ei ordinær anskaffing frå amerikanske styresmakter. I tillegg til sjølve flya omfattar anskaffinga moderne sensorar, overvakingssystem, nye antiubåtvåpen og støttesystem.

Kostnadsramma er på om lag 12 milliardar kroner (2024-verdi). I tillegg kjem kjøp av utstyr over Etterretningstenesta sine budsjett. Totale kostnader er rekna inn i langtidsplanen sine kostnadsrammer.

Bygginga av dei norske flya starta i februar 2021, og eit norsk fly tok av på testflyging for første gong i august 2021. Forsvarsmateriell overtok det første flyet i november 2021 og starta leveransane til Noreg og Evenes flystasjon i februar 2022.

Det femte og siste flyet blei overtatt i slutten av juni 2022. P-8A Poseidon tok over for P-3 Orion sommaren 2023.